سرگودھا: دشمنی، مسافر کوچ پر فائرنگ، خاتون سمیت 2 افراد قتل

سرگودھا (نمائندہ خصوصی) مسلح افراد نے مسافر گاڑی پر فائرنگ کر کے خاتون سمیت 2 افراد قتل جبکہ مقتولہ کی 20 سالہ بیٹی سمیت دو افراد شدید زخمی ہو گئے۔ آر پی او سرگودھا نے ڈی پی او سے رپورٹ طلب کر لی۔ ذرائع کے مطابق سرگودھا ریجن کے علاقہ خوشاب کٹھہ سگھرال روڈ پر موضع چھبیل کے قریب مسلح افراد نے راوالپنڈی سے جوہرآباد جانے والی مسافرکوچ پر فائرنگ کر دی، جس کے نتیجہ میں 45سالہ شمیم بی بی سمیت دو افراد موقع پرجاں بحق ہو گئے۔ جبکہ 20سالہ لائبہ ربنواز اور 50 سالہ محمد الیاس شدید زخمی ہو گئے۔ اطلاع ملتے ہی زخمیوں اور مقتولین کی نعشیں ریسکیو  1122 نے ہسپتال منتقل کر دیں۔ ابتدائی اطلاع کے مطابق فائرنگ سے جاںبحق مسافر خاتون شمیم بی بی اور اس کی زخمی بیٹی کی ذاتی دشمنی بتائی جا رہی ہے۔