قلات، ڈیرہ بگٹی: بارودی سرنگ دھماکے، ایک شخص جاں بحق، 2 سکیورٹی اہلکار زخمی

قلات+ ڈیرہ بگٹی+ کوئٹہ (نوائے وقت رپورٹ+ آئی این پی) قلات کے علاقے پارو میں سڑک کنارے ایک بارودی سرنگ کا دھماکہ ہو گیا۔ نیویز ذرائع کے مطابق دھماکے میں ایک شخص جاں بحق دوسرا زخمی ہو گیا۔ آئی این پی کے مطابق بلوچستان کے ضلع ڈیرہ بگٹی کے قریبی علاقے سنگسیلا میں روڈ کے کنارے بارودی سرنگ کے دھماکے میں دوسیکورٹی اہلکار زخمی ہوگئے جنہیں ہسپتال منتقل کر دیا گیا۔ ایک کی حالت تشویشناک بتائی جارہی ہے۔ علاوہ ازیں آپریشن ردالفساد کے تحت فرنٹیئرکور بلوچستان نے مستونگ میں کارروائی کرتے ہوئے تخریب کاری کا منصوبہ ناکام بنا دیا۔ آپریشن کے دوران بڑی تعداد میں اسلحہ اور دھماکہ خیزمواد برآمد ہوا۔ سیکورٹی ذرائع کے مطابق آپریشن ردالفساد کے تحت فرنٹیئرکور بلوچستان نے دہشت گردوں کی موجودگی کی اطلاعات پر گراڑ نالہ اور مستونگ میں کارروائیاں کیں۔ آپریشن کے دوران 5راکٹ مع لانچر،107ایم ایم 2 میزائل اور ہزاروں راؤنڈز برآمد کئے گئے۔