اسلام آباد(خبرنگار)پاکستان میں چین کے سفیر نونگ رونگ نے چائنا میڈیا گروپ کو انٹرویو دیتے ہوئے کہا کہ چین اور پاکستان کو   "چودہویں پانچ سالہ منصوبے " سے فائدہ اٹھاتے ہوئے اپنی اپنی صلاحیتوں کو بروئے کار لاتے ہوئے مشترکہ مفادات پر مبنی تعاون کو فروغ اور مل کر علاقائی انٹرکنیکشن اورامن و ترقی کو فروغ دینا چاہیے ۔نونگ رونگ نے کہا کہ دونوں ملکوں کے درمیان تجارت،صنعت اور زراعت سمیت دیگرشعبوں میں قریبی تعاون برقرار ہے۔چودہویں پانچ سالہ منصوبے پر عمل کے دوران دونوں ممالک کو نئے ترقیاتی ڈھانچے کی تشکیل کرنی چاہئے جس سے نہ صرف چین کی اقتصادی ترقی کو فروغ ملے گا،بلکہ پاکستان کو مزید گنجائش، تجارتی ماحول اور مواقع میسر آئیں گے۔گزشتہ چھ سال سے چین مسلسل پاکستان کا سب سے بڑا تجارتی شراکت دار رہا ہے اور سات سال سے پاکستان میں سب سے زیادہ سرمایہ کاری کررہا ہے ۔رواں سال چین پاکستان کے سفارتی تعلقات کے قیام کی سترویں سالگرہ منائی جا رہی ہے ۔چینی سفیر نونگ رونگ نے کہا کہ پاکستان میں چینی سفارتخانہ اس موقع سے فائدہ اٹھاتے ہوئے چین پاکستان تعاون کو مزید فروغ دینے کی کوشش کرے گا۔نونگ رونگ نے مزید کہا کہ امید ہے کہ چین پاکستان انسداد کروناوبا کا تعاون عالمی انسداد وبا کے تعاون کی مثال بنے گا۔انہوں نے کہا کہ سی پیک نے جنوبی ایشیا،وسطی ایشیا اور مغربی ایشیا میں انٹرکنیکشن کو مضبوط بنایا ہے اور مشترکہ ترقی کو فروغ دیا  ہے۔انہوں نے کہا کہ سی پیک کے تعاون میں تیسری فریق کی شرکت کا خیرمقدم کیا جاتا ہے۔