شہر بھر میں نصب ایل ڈبلیو ایم سی کے 5000ویسٹ کنٹینرز بروقت خالی 

لاہور(خبرنگار)شہر لاہور کے حسن کو بحال رکھنے کیلئے لاہور ویسٹ مینجمنٹ کمپنی کی جانب سے زیرو ویسٹ مہم کے تحت صفائی آپریشن بلا تعطل جاری ہے۔ شہر بھر میں نصب ایل ڈبلیو ایم سی کے نصب کردہ 5000ویسٹ کنٹینرز کو بروقت خالی کیا جا رہا ہے۔ سی ای او ایل ڈبلیو ایم سی کی ہدایت پر جمعہ کے افضل دن کی مناسبت سے ایل ڈبلیو ایم سی کی آپریشن ٹیموں نے واہگہ ٹاؤن، شالیمار ٹاؤن اور راوی ٹاؤن کی جامع مساجد میں خصوصی صفائی ایکٹیویٹی کی، ایل ڈبلیو ایم سی کمیونٹی ونگ کے سوشل موبلائزرز نے دوران خطبات جامع مساجدمیں صفائی کے بارے میں اعلانات کروائے۔ مساجد کے علماء نے جمعہ کے خطبات میں صفائی کی اہمیت پر زور دیااور صفائی ستھرائی یقینی بنانے کی تلقین کی۔ ترجمان ایل ڈبلیو ایم سی عمر چوہدری کے مطابق ایل ڈبلیو ایم سی کی سوشل موبلائزرز ٹیموں نے راوی ٹاؤن میں جامع مسجد قاسمیہ،جامع مسجد محمدیہ، جامع مسجد حنفیہ رضویہ اور جامع مسجد قباء میں نمازیوں کو صفائی سے متعلق آگاہی پیغامات پہنچائے۔