لاہور(سپورٹس رپورٹر)انگلینڈ اور پاکستان کی کرکٹ ٹیموں کے درمیان چار ٹی 20 میچوں پر مشتمل سیریز کا دوسرا میچ آج ہفتہ کو ایجبسٹن، برمنگھم میں کھیلا جائیگا ۔میچ شام ساڑھے چھ بجے شروع ہوگا۔ دونوں ٹیموں کے درمیان 22مئی کو ہیڈنگلے ،لیڈز میں شیڈول سیریز کا پہلا میچ بارش کی نذرہوگیا تھا۔پاکستانی ٹیم  بابر اعظم کی زیر قیادت میدان میں اتریگی ۔انگلینڈ ٹیم کو جوز بٹلرلیڈ کریں گے۔ذرائع کے مطابق محمد رضوان عثمان خان یا صائم ایوب میں سے کسی ایک کیساتھ اننگز کا آغاز کرنے کیلئے تیار ہیں۔مڈل آرڈر میں فخر زمان، اعظم خان جیسے ہٹرز شامل ہیں جو وکٹ کیپنگ گلوز بھی پہنیں گے، افتخار احمد اور آل راؤنڈر عماد وسیم ٹیم کو رنز بنانے اور ضرورت پڑنے پر اننگز کو تیز کرنے کیلئے مضبوط بنیاد فراہم کرتے ہیں۔فاسٹ بائولنگ کی قیادت شاہین آفریدی اور نسیم شاہ کرینگے اور حارث رؤف انجری سے واپس آ رہے ہیں جو میدان میں اتریں گے۔محمد عامر کو آرام دیا جاسکتا ہے ۔