لاہور(سپورٹس رپورٹر)تیسری ٹیبل ٹینس چیمپئنز لیگ کی ڈرافٹنگ کا عمل مکمل ہوگیا، لیگ کی شاندار ٹرافی کی رونمائی گورنر سندھ کامران ٹیسوری نے کی،کراچی جیم خانہ میں ہونے والی تیسری ٹیبل ٹینس چیمپئنز لیگ کی پلیئرز ڈرافٹنگ ہوئی جس میں 8 فرنچائزز کی ٹیمیں شریک ہیں۔ گولڈ ، پلاٹینیئم اور سلور کیٹیگری کیلئے 44پلیئرز شرکت کر رہے ہیں،لیگ میں عاصم قریشی ، فہد خواجہ ، فیضان ظہور ، پر نیا خان، حائقہ حسن ،حور فواد اور کلثوم خان گولڈ کیٹیگری کے مہنگے ترین پلیئرز میں شامل ہیں۔گورنر سندھ کامران ٹیسوری مہمان خصوصی تھے ،انہوں نے چیمپئنز لیگ کی ٹرافی کی رونمائی کی اورکہا کہ ٹیبل ٹینس کے کھیل کی پروموشن کیلئے ہر ممکن کوشش کریں گے، چیمپئنز لیگ کا انعقاد خوش آئند ہے نوجوانوں میں ٹیبل ٹینس کا رجحان بڑھ رہا ہے۔ خوشی کی بات ہے کہ بزنس کمیونٹی بڑی تعداد میں کھیلوں کو سپورٹ کر رہی ہے۔