لاہور(سپورٹس رپورٹر)پاکستان کی 18 رکنی جونیئر ہاکی ٹیم نے ایشین جونیئر کپ ہاکی ٹورنامنٹ کیلئے اومان کے شہر مقسط میں ڈیرے ڈال لئے ہیں۔مسقط میں کل 26 نومبرسے 4 دسمبر 2024 تک شیڈول 10 ٹیموں کے ایونٹ کوعالمی جونیئر کپ ہاکی ٹورنامنٹ کے کوالیفائنگ راونڈ کی حیثیت حاصل ہے، پہلی 6 پوزیشن پانے والی ٹیمیں ایف آئی ایف کے تحت اگلے برس ہونے والے عالمی جونیئر کپ میں شرکت کی حامل ہوں گی۔ایشین جونیئرکپ کے لیے قومی جونیئر سکواڈ کی قیادت عبدالحنان کر رہے ہیں، انٹرنیشنل ہاکی فیڈریشن کا رائزنگ سٹار ایوارڈ جیتنے والے پہلے پاکستانی کھلاڑی سفیان خان نائب کپتان ہیں۔کھلاڑیوں نے گزشتہ روز کوچز کی زیر نگرانی پریکٹس سیشن میں حصہ لیا ۔پاکستان پہلا گروپ میچ 27 نومبر کو چین کیخلاف کھیلے گا، دوسرے میچ میں بنگلا دیش سے مقابلہ ہوگا، 30 نومبرکو تیسرے میچ میں ملائیشیا سے مقابلہ ہوگا۔