پاکستان کیلئے امریکہ کے نئے سفیر رچرڈ اولسن 27 اکتوبر کو اسلام آباد پہنچیں گے

اسلا م آباد (آئی این پی) پاکستان کیلئے امریکہ کے نئے سفیر رچرڈ اولسن 27 اکتوبر کو عید الاضحیٰ کے دن اسلام آباد پہنچیں گے۔بدھ کو دفتر خارجہ کے ذرائع کے مطابق پاکستان کے لیے امریکہ کے نئے سفیر رچرڈ اولسن رواں ماہ 27 اکتوبر کو اسلام آباد پہنچ رہے ہیں۔ امریکی سفیر صدر آصف زرداری کو اپنی اسناد سفارت پیش کریں گے۔ ادھر امریکی سفارت خانے سے جاری بیان میں کہا گیا ہے کہ نئے امریکی سفیر نے پاکستانی عوام کے نام اپنا پیغام ریکارڈ کرا دیا ہے جو 24 اکتوبر سے اسٹیٹ ڈیپارٹمنٹ اور امریکی سفارت خانے کی ویب سائٹ پر دستیاب ہے۔امریکی سفیر نے اپنے پیغام میں کہا ہے کہ پاکستان امریکہ کےلئے انتہائی اہم ملک ہے اور امریکہ پاکستان سے مثبت اور دیرپا تعلقات چاہتا ہے۔ نئے امریکی سفیر رچرڈ اولسن کا کہنا ہے کہ وہ پاکستان اور امریکہ کے درمیان مضبوط تعلقات کے لیے اپنا ہر ممکن کردار ادا کریں گے۔