لاہور(نمائندہ سپورٹس ) قومی با ئولنگ کوچ اظہر محمود نے کہا ہے کہ عثمان شنواری نے محمد عامر کی کمی محسوس نہیں ہونے دی، بائولرز باصلاحیت ہوں تو کوچ کیلئے پلاننگ آسان ہو جاتی ہے۔ برصغیر میں فاسٹ بائولرز کو بہت زیادہ پسند کیا جاتا ہے، ایک وقت میں وسیم اکرم اور وقار یونس کا طوطی بولتا تھا،وقار یونس خوبصورت رن اپ کے ساتھ بائولنگ کیلئے کریز کی جانب بڑھتے تو پورا کراوڈ ساتھ شور مچا رہا ہوتا تھا۔ اب یہی صورتحال حسن علی کے کیریئر میں بھی نظر آنے لگی ہے۔ گزشتہ 9 میچز میں ان بائولرز نے کسی ٹیم کو 250 سے زائد رنز نہیں بنانے دیئے جوخوش آئند ہے لیکن نیوزی لینڈ، جنوبی افریقہ میں 350 بھی بن سکتے ہیں، بائولرز کو سپورٹ کرتے ہوئے سیکھنے اور کارکردگی میں مزید بہتری لانے کا موقع دینا ہو گا۔