سپین نے کراٹے ورلڈ چیمپئن شپ کیلئے پاکستانی ٹیم کو ویزہ دینے سے انکارکردیا

اسلام آباد(آئی این پی)اسپین نے ورلڈ چیمپئن شپ کے لئے پاکستان کراٹے ٹیم کو ویزہ دینے سے انکار کردیا۔ میڈرڈ میں 6 نومبر سے ورلڈ سینئر کراٹے چیمپئن شپ ہورہی ہے جو کہ 2020اولمپکس کا کوالیفائنگ راونڈ بھی ہے، اس ایونٹ کیلئے 4رکنی قومی ٹیم نصیر احمد، کلثوم ، نرگس اور کوچ شاہ محمد نے اسپین کی ایمبیسی میں ویزہ کے لئے درخواست جمع کروائی تھی جو کہ مسترد کردی گئی ہے۔ ان کے ساتھ کوچنگ کورس میں شرکت کے خواہشمند بابر اقبال اور محمد کاشف کو بھی ویزہ دینے سے انکار کردیا گیا ہے۔قومی ٹیم کے کھلاڑیوں نے اسپین کی جانب سے اس سلوک پر سخت افسوس کا اظہار کیا اور حکومت سے مطالبہ کیا ہے کہ پاکستان کی پہچان بننے والے میڈلسٹس کو عالمی ایونٹ میں شرکت سے محروم رکھے جانے کا نوٹس لینا چاہیے۔پاکستان کراٹے فیڈریشن کے صدر محمد جہانگیر نے بتایا کہ نصیر احمد کو آئی او سی نے اسکالرشپ دے رکھی ہے، انہیں ورلڈ چیمپئن شپ میں حصہ لینے کے نمبر ملنا تھے۔ جس سے اسے اولمپکس میں شرکت کے لیے مدد ملتی لیکن بڑے دکھ کی بات ہے کہ کسی کو بھی ویزہ نہیں دیا گیا۔ انہوں نے یہ جواز پیش کیا کہ کھلاڑیوں کے پاکستان واپس آنے کا یقین نہیں، یہ تمام کھلاڑی ایک عرصے سے بیرون ملک پاکستان کی نمائندگی کے ساتھ میڈلز بھی جیت کر لارہے ہیں۔