اسلام آباد چیمبرکے وفد کا دورہ امریکہ ، فلوریڈا میڈیکل ایکسپو میں شرکت

اسلام آباد ( نمائندہ خصوصی ) اسلام آباد چیمبر آف کامرس اینڈ انڈسٹری کے ایک وفد نے چیمبر کی ڈیلیگیشن کمیٹی کے کنوینر امیر حمزہ کی قیادت میں امریکہ کا دورہ کیا اورامریکہ کے شہر میامی میں منعقد ہونے والی 3 روزہ فلوریڈا انٹرنیشنل میڈیکل ایکسپو میں شرکت کی۔ وفد نے اس موقع پر نمائش میں شرکت کرنے والے امریکی اور دیگر ممالک کے وفود سے ملاقات کی اور ان کے ساتھ پاکستان کی تجارت و برآمدات کو فروغ دینے کے امور پر بات چیت کی۔ وفد نے امریکہ کی مارکیٹ میں پاکستان کی ہیلتھ کئیر مصنوعات کی برآمدات کے امکانات کا جائزہ لیا۔ ایکسپو میں 116 ممالک کے 13500 سے زائد ماہرین صحت نے شرکت کی اور 1150 سے زائد نمائش کنندگان نے ہیلتھ کئیر مصنوعات کی نمائش کی۔ ایکسپو میں شرکت سے آئی سی سی آئی کے وفد کو شرکاءکے ساتھ روابط قائم کرنے، معلومات کا تبادلہ کرنے اور دنیا میں ہیلتھ کئیر شعبے میں ہونے والی پیش رفتوں اور مصنوعات کو دیکھنے کے عمدہ مواقع فراہم ہوئے۔آئی سی سی آئی کے وفد میں فصیح اللہ خان، امتیاز عباسی، اشفاق حسین چٹھہ، ہمایوں کبیر، ضیاءخالد چوہدری، عبدالرحمان صدیقی اور دیگر شامل تھے۔