اسلام آباد (خبر نگار خصوصی) چیئرمین جوائنٹ چیفس آف سٹاف کمیٹی جنرل ساحر شمشاد مرزا سے سری لنکن فضائیہ کے کمانڈر ایئر مارشل راجہ پاکسے جو کہ پاکستان کے سرکاری دورے پر ہیں نے جوائنٹ سٹاف ہیڈ کوارٹرز راولپنڈی میں ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران فریقین نے دوطرفہ سکیورٹی اور دفاعی تعاون بڑھانے کے عزم کا اعادہ کیا۔ چیئرمین جوائنٹ چیفس آف سٹاف کمیٹی جنرل ساحر شمشاد مرزا نے کہا کہ پاکستان سری لنکا کے ساتھ اپنے پائیدار تعلقات کو قدر کی نگاہ سے دیکھتا ہے اور یہ دورہ باہمی تعلقات بالخصوص دفاع اور سلامتی کے شعبوں میں دوطرفہ تعلقات کو مضبوط بنانے کے مشترکہ عزم کو اجاگر کرتا ہے۔ ائیر مارشل راجا پاکسے نے پاکستان کی مسلح افواج کے اعلیٰ پیشہ ورانہ معیار، دہشت گردی کے خلاف جنگ میں ان کی کامیابیوں اور علاقائی امن و استحکام کے لیے جاری کوششوں کو سراہا۔ قبل ازیں جوائنٹ سٹاف ہیڈ کوارٹر پہنچنے پر تینوں مسلح افواج کے چاک و چوبند دستے نے سری لنکن فضائیہ کے کمانڈر کو گارڈ آف آنر پیش کیا۔