ساگری موڑ ،پوٹھوہاری شعر خواں چوہدری احتشام گجرکی گاڑی کو حادثہ 

کلر سیداں (نامہ نگار) کلر سیداں روات روڈ پر ساگری موڑ کے قریب ٹریفک کے حادثے میں ایک شخص جاں بحق جبکہ تین افرادزخمی ہو گئے،ٹریفک کا یہ حادثہ جمعرات کی صبح 3بجے کے قریب پیش آیا۔حادثے کی اطلاع ملتے ہی سٹی ٹریفک پولیس کلر سیداں کے بیٹ انچارج راجہ سہیل صابر موقع پر پہنچ گئے اور اپنی رپورٹ تیار کر کے سی ٹی او آفس راولپنڈی بھجوا دی جس کے مطابق معروف فنکار پوٹھوہاری شعر خواں چوہدری احتشام گجر گوجرخان کے علاقے میں شعر خوانی کے پروگرام سے فارغ ہو کر اپنے کزن چوہدری ادریس اور دیگر دو ساتھیوں کے ہمراہ اپنے گھر واقع توپ مانکیالہ واپس آ رہے تھے کہ ساگری کے قریب تیزرفتاری کے باعث ان کی گاڑی بے قابو ہو کر رانگ سائیڈ پر چلی گئی اور روڈ کے قریب کھڑے ٹرک کیساتھ ٹکرانے کے بعد الٹ گئی جس کے نتیجے میں ان کا کزن ادریس گجر موقع پر ہی جاں بحق ہو گیا جبکہ دیگر افراد کو معمولی چوٹیں آئیں۔حادثے میں جاں بحق ہونے والے چوہدری ادریس گجر کو آبائی قبرستان توپ مانکیالہ میں سپرد خاک کر دیا گیا۔