نواز شریف کی 21 اکتوبر کو واپسی اٹل، والہانہ استقبال کریںگے: عطاءتارڑ

گوجرانوالہ (نمائندہ خصوصی) مسلم لیگ ن کے رہنما عطاءتارڑ نے کہا ہے کہ عمران نیازی نے 4 سال میں نواز شریف کے پاکستان کا بیڑہ غرق کر دیا۔ انھوں نے معیشت پر کوئی کام نہیں کیا یہ اور پنکی پیرنی اکٹھے ہو کر چیزیں بیچنے کی پلاننگ کرتے تھے۔ اگر معیشت پر کام کیا ہوتا تو آج مہنگائی نہ ہوتی اور پٹرول مہنگا نہ ہوتا۔ انہوں نے نئے پاکستان کا نعرہ لگایا تھا ہم پرانے پاکستان کا نعرہ لگائیں گے، ہمیں وہی پرانا پاکستان چاہیے جس میں کوئی مسئلہ نہیں تھا۔ ان خیالات کا اظہار انھوں نے گکھڑ منڈی میں ورکر کنونشن سے خطاب کرتے ہوئے کیا۔ انھوں نے کہاکہ میاں نواز شریف وطن واپس آرہے ہیں۔21 اکتوبر اٹل تاریخ ہے، اس میں ردو بدل کا کوئی امکان نہیں ہم اپنے قائد کا والہانہ استقبال کریں گے۔ ہم سب بسوں میں سوار ہو کر قافلوں کی صورت میں لاہور جائیں گے۔