گوجرانوالہ(نمائندہ خصوصی )چیمبر آف کامرس اینڈ انڈسٹری کے ایسوسی ایٹ کلاس الیکشن میں بزنس گروپ نے کلین سویپ کرکے ون یونٹی گروپ کو بولڈ کردیا‘ بزنس گروپ نے کارپوریٹ اور ایسوسی ایٹ کلاس کی ٹوٹل 30سیٹوں میں سے 29سیٹیں جیت کر صدارت کی کرسی پر قبضہ جما لیا‘بزنس گروپ کے شہزاد اسلم سب سے زیادہ ووٹ لیکر پہلے اور عدیل بخاری دوسرے نمبر پر رہے ،تفصیلات کے مطابق گوجرانوالہ چیمبر آف کامرس اینڈ انڈسٹری کے سوموار کو ہونیوالے ایسوسی ایٹ کلاس کے الیکشن کے نتائج کا اعلان ممبرز الیکشن کمیشن محمد انور اسلم، شاہد بٹ اور خواجہ صائم الحسن نے کردیا ہے جسکے مطابق بزنس گروپ نے تمام 15سیٹیں جیت کر کلین سویپ کیا ،بزنس گروپ کو 2118پینل ووٹ ملے۔ چیمبر آف کامرس میں بزنس گروپ کی 2 خواتین بلامقابلہ ایگزیکٹو ممبرز منتخب ہو گئیں۔بزنس گروپ نے ڈیمو کریٹ گروپ کے چیئرمین  عابد سہیل بھٹی کو ایک لیڈیز سیٹ دی جس پر انہوں نے مسز اعجاز کے ایگزیکٹو ممبر کیلئے کاغزات نامزدگی جمع کروائے جبکہ بزنس گروپ کی طرف سے دوسری لیڈیز سیٹ کیلئے مسز عبدا لرحمان مغل نے کاغذات نامزدگی جمع کروائے۔ ان دو خواتین کے مقابلے میں کسی امیدوار نے کاغذات داخل نہیں کرائے۔