میرپور ماتھیلو: کنوئیں سے بکری نکالتے3 بھائیوں سمیت 4 افراد جاں بحق

میرپور ماتھیلو (تنویر احمد سومرو‘ نمائندہ) پانی کے پرانے کنوئیں میں گری ہوئی بکری کو نکالنے کے لئے جانے والے چار افراد دم گھٹنے کے باعث جاں بحق ہو گئے، جاں بحق ہونے والوں میں تین سگے بھائی بھی شامل، تین کی نعشیں نکال لی گئیں۔ چوتھی کی تلاش جاری ہے، تفصیلات کے مطابق نواحی علاقے گڑھی چاکر کے قریب واقع گاؤں ملک میں ایک کافی عرصے سے ناقابلِ استعمال کنویں میں بکری گر گئی جس کو نکالنے کے لئے ایک دوسرے کے پیچھے جانے والے چار افراد جن میں جاوید ولد سہراب ملک، صوبو ولد نور محمد ملک،اعجاز ولد نور محمد ملک ،جاوید ولد نور محمد ملک شامل ہیں دم گھٹنے کے باعث جاں بحق ہوگئے جن کی لاشیں نکال کر میرپور ماتھیلو سول اسپتال منتقل کردی گئیں جبکہ کنویں میں اترنے والے چوتھے شخص کی لاش کنویں سے نکالنے کے کنویں کے اطراف میں ہیوی مشینری سے کھدائی کا کام رات گئے تک جاری رہا۔ چار افراد کی ہلاکتوں پر علاقے کی فضاء سوگوار اور ہر آنکھ اشک بار تھی۔ لاشیں نکال لی گئیں۔