ڈیفنس: معروف کاروباری شخصیت کے گھر ساڑھے 6کروڑ روپے کی چوری، کئی علاقوں میں ڈکیتیاں

لاہور (نامہ نگار+ نمائندہ خصوصی) ڈیفنس اے کے علاقہ میں چوروں نے معروف کاروباری شخصیت حسنین حیدر شیخ کے گھر سے ساڑھے 6کروڑ روپے مالیت کی نقدی، ہیرے اور طلائی زیورات چوری کرلئے اور فرار ہو گئے ہیں۔ تفصیلات کے مطابق چوروں نے ڈیفنس اے کے علاقہ وائے بلاک، فیز تھری کی رہائشی معروف کاروباری شخصیت حسنین حیدر شیخ کے گھر گھس کر الماری کے تالے توڑ کرساڑھے 6کروڑ روپے مالیت کی نقدی، ہیرے اور طلائی زیورات چوری کرلئے ہیں۔ جن میں 4کروڑ 80لاکھ روپے مالیت کے13سو تولے طلائی زیورات، ڈیڑھ کروڑ روپے مالیت کے 6ہیرے کے سیٹ اور 10انگوٹھیاں اور 19لاکھ روپے نقدی شامل ہے۔ اطلاع ملنے پر پولیس نے موقع پر پہنچ کر تفتیش شروع کر دی ہے جبکہ پولیس نے حسنین حیدرشیخ کی مدعیت میں مقدمہ درج کر لیا ہے۔ پولیس کے مطابق جلد واردات کا سراغ لگا لیا جائے گا۔دریں اثناء لاہور میں متعدد وارداتوں میں شہری لاکھوں روپے کی جمع پونجی سے محروم، ذرائع کے مطابق کاہنہ کے علاقے میں مسلح ڈاکو گھر میں گھس کر کے یاسر اور اہلخانہ کو گن پوائنٹ پر یرغمال بنا کر2لاکھ 80ہزار مالیت کی نقدی طلائی زیورات لوٹ کر فرار ہو گئے۔ مستی گیٹ کے علاقے میں ڈاکو مبشر اور اس کی فیملی سے اسلحہ کے زور پر2لاکھ روپے لوٹ کر فرار ہو گئے۔ جبکہ جو ہر ٹا ئو ن کے علاقے میں2موٹرسائیکل سوار ڈاکو اسلم اور اس کی فیملی سے گن پوائنٹ پر1لاکھ روپے 10ہزار روپے نقدی وو طلائی زیورات۔ ماڈل ٹاون کے علاقے میں ڈاکو عرفان اور فیملی سے گن پوائنٹ پر50ہزار روپے نقدی و طلائی زیورات، سندر میں مسلح ڈاکوظہیر اور فیملی سے 75ہزارروپے نقدی و طلائی زیورات لوٹ کر فرار ہو گئے جبکہ ڈیفنس بی کے علاقے میں ڈاکو گن پوائنٹ پر جاوید سے 60ہزار اور موبائل فون۔گارڈن ٹائون سے ڈاکو ماجد سے35ہزار نقدی اور موبائل فون۔ شاہدرہ ٹائون میں قاسم سے ڈاکو گن پوائنٹ پر 75ہزار نقدی اور موبائل فون۔ بھاٹی گیٹ سے ڈاکو گن پوائنٹ پرعمر ان خان سے 45ہزار نقدی اور موبائل فون لوٹ کر فرار ہو گئے جبکہ ہنجر وال اور شفیق آباد سے گاڑیاں اور لوئر مال، بھاٹی گیٹ، نو لکھا سے موٹر سائیکلیں چوری کر لی گئیں۔