لاہور (نوائے وقت رپورٹ)  پاکستان مسلم لیگ (ن) کے صدر و قومی اسمبلی میں قائد حزب اختلاف شہباز شریف نے ڈسکہ سے نومنتخب رکن قومی اسمبلی نوشین افتخار کو ٹیلی فون کیا۔ شہباز شریف نے نوشین افتختر کو ڈسکہ میں انتخاب جیتنے پر مبارکباد دی اور کہا کہ عوام نے ظاہرے شاہ مرحوم کی بیٹی کو اپنی بیٹی کے طور پر عزت دی۔  شہباز شریف کا نوشین افتخار سے کہنا تھا کہ آپ نے جرات سے ووٹ چوری اور حکمران جماعت کی لاقانونیت کا مقابلہ کیا۔ حلقے کے عوام نے ووٹ دینے کے ساتھ اس کا پہرہ بھی دیا۔ شہبازشریف نے کہا ہے کہ بھارت میں کرونا سے بے گناہ انسانوں کی ہلاکتوں پر بے حد افسوس ہے۔ بھارت سے آنے والے روح فرسا مناظر ہر صاحب دل کو غمزدہ کرنے کا باعث ہیں۔ ٹوئٹر پر اپنے بیان میں انہوں نے کہا کہ ہم متاثرہ خاندانوں سے دلی ہمدردی کا اظہار کرتے ہیں، کرونا عالمی وبا  انسانیت کا قتل عام کررہی ہے۔ ہمیں بحیثیت انسان دیگر بے بس انسانوں کی زندگیوں کے احترام اور انہیں بچانے کے لئے مشترکہ کوششوں کی طرف آنا ہوگا۔  مسلم لیگ ن کے صدر شہباز شریف نے لاہور میں موچی دروازے کا دورہ کیا اور پارٹی کے دیرینہ کارکن کبیر تاج کے گھر بھی گئے۔ شہباز شریف اور حمزہ شہباز نے کبیر تاج اور ان کے اہلخانہ کا شکریہ ادا کیا۔ اس موقع پر شہباز شریف نے کہا کہ اندرون  شہر آ کر پرانی یادیں تازہ ہوگئیں۔ انہوں نے کہا یہاں سڑک پر اینٹیں میں نے لگوائی تھیں۔ پورے علاقے میں پانی کی لائنیں بھی میں نے بچھوائیں، بجلی کی تاریں بھی میں نے لگوائیں اور دو ہسپتال میں نے بنوائے۔