گڑھ مہاراجہ‘ جھنگ ‘ساہیوال(نمائندہ نوائے وقت+ نامہ نگار) گڑھ مہاراجہ کے نواحی علاقہ بستی کپوری کے نزدیک المناک ٹریفک حادثہ میں دو خواتین‘ تین مرد اور ایک بچے سمیت ایک ہی خاندان کے چھ افراد جاں بحق ہو گئے۔ تھانہ گڑھ مہاراجہ کے علاقے لیہ روڈ بستی کپوری کے نزدیک گوجرہ سے لیہ جانے والی کوسٹر اور لیہ سے آنے والے کیری ڈبے کے درمیان خوفناک حادثہ پیش آیا۔ حادثہ کے نتیجہ میں لیہ ( پیر جگی) سے تعلق رکھنے والے ایک ہی خاندان کی دو خواتین ارشاد مائی، خورشید مائی، تین مردوں یوسف، غلام قاسم، احمد علی، اور سات سالہ بشیر سمیت چھ افراد موقع پر جاں بحق ہو گئے جبکہ سات کے قریب مسافر زخمی  ہو گئے۔ زخمیوں اور جاں بحق ہونے والے مسافروں کو ریسکیو 1122 کے اہلکاروں نے آر ایچ سی ہسپتال گڑھ مہاراجہ منتقل کر دیا۔ کیری ڈبہ  لیہ سے فیصل آباد کی طرف جا رہا تھا کہ گڑھ مہاراجہ کی طرف جانے والی کوسٹر بس کو اوور ٹیک کرتے ہوئے تصادم ہو گیا۔تیز رفتار کار ٹرالر سے ٹکرانے کے نتیجہ میں 3 طالب علم جاں بحق ہو گئے۔ کامسیٹ یونیورسٹی کے 3طالب علم کار میں تیز رفتاری سے آ رہے تھے کہ شرقی بائی پاس کے قریب کار ٹرالر سے ٹکرا گئے۔ جس کے نتیجہ میں ایک طالب علم موقع پر جاں بحق جبکہ 2 شدید زخمی ہوگئے۔ جنہیں ریسکیو 1122نے فوری پہنچ کر زخمیوںکو طبی امداد دیکر ساہیوال ٹیچنگ ہسپتال منتقل کیا مگر وہ دونوں زخموںکی تاب نہ لاکر دم توڑ گئے۔ جاں بحق طلباء کے نام شیخ ولید فہیم اور احمد شیروز ہیں جن کی عمریں 21/22 سال ہیں۔