محسن نقوی سے سکاٹ وین انک کی ملاقات، نیوزی لینڈ کے کرکٹرز کی سکیورٹی بہترین: چیف ایگزیکٹو

لاہور(سپورٹس رپورٹر)پاکستان کرکٹ بورڈ کے چیئرمین محسن نقوی سے نیوزی لینڈ کرکٹ کے چیف ایگزیکٹو آفیسر سکاٹ وین انک نے ملاقات کی ہے۔ ملاقات میں پاکستان اور نیوزی لینڈ کے درمیان سیریز اور اگلے برس نیوزی لینڈ میں کرکٹ سیریز پر تبادلہ خیال کیا گیا۔پاکستان کرکٹ ٹیم اگلے برس چیمپئنز ٹرافی کے بعد نیوزی لینڈ کا دورہ کریگی جہاں 5 ٹی ٹونٹی اور 3 ون ڈے میچ کھیلے جائیں گے۔محسن نقوی نے کرکٹ سیریز کیلئے پاکستان آمد پر چیف ایگزیکٹو آفیسر نیوزی لینڈ کرکٹ کا شکریہ ادا کیا اور کہا کہ کیوی کھلاڑیوں کی سکیورٹی بے حد عزیز ہے۔ چیئرمین پی سی بی نے کہا کہ کھلاڑیوں کی سکیورٹی کیلئے فول پروف انتظامات کیے گئے ہیں، کیوی کھلاڑی ہمارے معزز مہمان ہیں ان کا خیال رکھنا ہماری ذمہ داری ہے۔ ذاتی طور پر تمام انتظامات اور سکیورٹی پلان کی مانیٹرنگ کر رہا ہوں۔نیوزی لینڈ کرکٹ کے چیف ایگزیکٹو آفیسر سکاٹ وین انک نے پاکستان میں شاندار انتظامات کو سراہا اور محسن نقوی کا شکریہ ادا کیا۔ان کا کہنا تھا کہ نیوزی لینڈ کرکٹ ٹیم کیلئے راولپنڈی اور لاہور میں بہترین انتظامات کیے گئے ہیں۔ دونوں جگہ بہترین انتظامات دیکھ کر خوشی ہوئی۔ نیوزی لینڈ کرکٹ ٹیم 3 ملکی سیریز کھیلنے چیمپئنز ٹرافی سے پہلے پاکستان آئیگی۔اس ملاقات میں پی سی بی کے چیف آپریٹنگ آفیسر سلمان نصیر، ڈائریکٹر انٹرنیشنل کرکٹ عثمان واہلہ بھی موجود تھے۔