لاہور(سپورٹس رپورٹر) 73 ویں پنجاب گیمز آج سے صوبے کے مختلف ڈویژن میں شروع ہونگی۔افتتاحی تقریب الحمرا ہال میں ہوگی، پنجاب گیمز کی ٹارچ ریلی کا گذشتہ روز لاہور میں انعقاد ہوا جس میں مختلف کھیلوں سے تعلق رکھنے والے کھلاڑیوں نے ٹارچ کو اٹھا کر تقریباً 2 کلو میٹر کا فاصلہ طے کیا۔ اس موقع پر شاہراہ قائداعظم پر ریلی کے شرکاء مینز اور ویمنز کھلاڑیوں نے پنجاب گیمز کے حق میں نعرے بازی کی۔ بعدازاں کھلاڑی اور آفیشلز اولمپک ہاوس پہنچ گئے جہاں اولمپک پرچم کے ساتھ ساتھ کبوتر فضا میں بلند کئے گئے۔ جاوید سلیم نے کھلاڑیوں کو اولمپک موومنٹ کے حوالے سے لیکچر دیا۔ پنجاب گیمز کی باقاعدہ افتتاحی تقریب آج صبح الحمرا ہال لاہور میں منعقد ہوگی جس کے مہمان خصوصی گورنر پنجاب چودھری محمد سرور ہونگے۔