کلرسیداں،بستی ڈھوک صابری میں گیس لیکج سے زوردار دھماکہ،،ماں بیٹا جھلس کرزخمی  

کلرسیداں(نامہ نگار)ڈھوک صابری کے رھائشی عنصر محمود کے گھر گیس کی لوڈ شیڈنگ کے نتیجے میں المناک حادثہ پیش آیا جہاں کچن میں جلتا چولھا سوئی گیس لوڈ شیڈنگ سے بند ھو گیا اور گھر والے وال کوبند کرنا بھول گئے اور رات گئے گیس آکر پورے کمرے میں پھیل گئی۔ رات دو بجے کے قریب 19سالہ محنت کش نوجوان عبدالرحمان جو رکشہ پر مزدوری کرتا تھا گھر واپس لوٹا اس نے لائٹ آن کی جس سے زور دار دھماکے ساتھ ہی آگ بھڑک اٹھی جس کے نتیجے میں عبدالرحمان اور اس کی 45 سالہ والدہ مسمات زلیخا بی بی آگ سے بری طرح جھلس گئے۔جن کو طبی امداد کے لیے فوری طور پرہولی فیملی ہسپتال راول پنڈی منتقل کر دیا گیا جہاں زخمی خاتون کی حالت تشویشناک بتائی جاتی ہے ۔ گیس لیکج دھماکہ سے گھر کی دیواروں کو شدید نقصان پہنچا۔