مسیحی برادری  نے کرسمس کا تہوار  جوش و جذبے کیساتھ منا یا 

 لاہور (آئی این پی) سپاکستان سمیت دنیا بھر میں مسیحی برادری نے کرسمس کا تہوار مذہبی جوش و جذبے کے ساتھ منا  یا ۔ کرسمس کے موقع پر مسیحی برادری نے ملک بھر کے تمام گرجا گھروں کو برقی قمقموں سے سجا دیا  ، کرسمس پر ملک کے چھوٹے بڑے شہروں میں مسیحی برادری نے گلی کوچوں کی سجانے کے ساتھ گھروں میں کرسمس ٹری بھی سجائے  ۔ دن کے آغاز پر گرجا گھروں میں دعائیہ تقریبات منعقد کی گئیں، جس میں پاکستان کی ترقی و خوشحالی کیلئے خصوصی دعائیں مانگی گئیں۔ مسیحی برادری کا کرسمس کے خاص موقع پر کہنا ہے کہ حضرت عیسی علیہ اسلام نے محبت اور بھائی چارے کا جو درس دیا اسے ہر سو پھیلایا جائے گا، کرسمس کا تہوار اپنے ساتھ خوشی ، روشنی اور امن کا پیغام سمیٹ کر لاتا ہے، سال بھر اس تہوار کا انتظار کرتے ہیں۔ وفاقی دارالحکومت اسلام آباد میں بھی مسیحی برادری نے خوب تیاری  کی ، سیکٹر ایف سیون میں مسیحی برادری نے کرسمس کو خوش آمدید کہنے کیلئے سجاوٹ کا بھرپور انتظام کیا  گیا ۔