لاہور(نامہ نگار)سابق وزیراعظم پاکستان بے نظیر بھٹو شہید کاکل بدھ،27دسمبر 16 واں یوم شہادت ہے۔پاکستان پیپلز پارٹی کے زیر اہتمام سابق وزیراعظم بے نظیر بھٹو شہید کے 16 ویں یوم شہادت کے موقع پر کل 27دسمبر بروز بدھ اظہار عقیدت کے لئے تقریبات اورقرآن خوانی کی محافل کا انعقاد کیا جائے گا۔شہید جمہوریت بینظیر بھٹو کی 16 ویں برسی کے سلسلہ میں گڑھی خدا بخش لاڑکانہ میں27 دسمبر کو مرکزی تقریب منعقد ہوگی۔لاڑکانہ گڑھی خدا بخش میں منعقدہ تقریب کے جلسہ سے پارٹی چیئرمین بلاول بھٹو زرداری، سابق صدر آصف علی زرداری، چاروں صوبوں کے پارٹی صدور سمیت پارٹی کے مرکزی عہدیداران خطاب کریں گے اور شہید محترمہ بینظیر بھٹو کے کارناموں سمیت ان کی ملکی و سیاسی خدمات پر انہیں خراج عقیدت پیش کریں گے۔پاکستان پیپلز پارٹی وسطی پنجاب کے قائمقام صدر رانا فاروق سعید نے وسطی پنجاب کی تمام ڈویژنل، ڈسٹرکٹ، تحصیل اور سٹی تنظیموں ، ذیلی ونگز اور قومی و صوبائی اسمبلی کے امیدواروں کو ہدایت کی ہے کہ وہ اپنے تنظیمی دفاتر، ضلعی مقامات اور حلقوں بی بی شہید کی برسی  پر انہیں خراج عقیدت پیش کرنے کے لئے تقریبات کا اہتمام کریں اور قرآن خوانی کی محافل منعقد کریں۔