لاہور(سپورٹس رپورٹر) پاکستان قومی کرکٹ ٹیم کے سابق کپتان شعیب ملک اور ان کی اہلیہ و بھارتی سابق ٹینس سٹار ثانیہ مرزا ایک پیج پر آگئے۔ حال ہی میں متحدہ عرب امارات میں نجی اکیڈمی کی جانب سے تیراکی کے مقابلوں کا انعقاد کیا گیا۔ شعیب ملک اور ثانیہ مرزا کے بیٹے اذہان مرزا ملک نے بھی ان مقابلوں میں حصہ لیا۔ یہ پہلا موقع ہے جب اذہان مرزا ملک نے کسی کھیل میں ناصرف حصہ لیا بلکہ اسے اپنے نام بھی کرلیا۔ بیٹے کے اس خاص دن پر دونوں والدین نے تیراکی کے مقابلوں کی تقریب میں شرکت کی۔ صرف یہ ہی نہیں بلکہ اس کی تصاویر سوشل میڈیا پر بھی شیئر کیں۔ پاکستانی کھلاڑی نے بیٹے کی کامیابی پر اسے مبارکباد دیتے ہوئے پوسٹ تصاویر کے کیپشن میں لکھا کہ بابا کو آپ پر بیحد فخر ہے۔ پہلا مقابلہ اور پہلی جیت۔ دوسری جانب بھارتی سابق ٹینس سٹار نے بیٹے کی جیت کی خوشی میں 2 مختلف سٹوری شیئر کیں جن میں مقابلے سے پہلے اور مقابلے کے بعد کے مناظر تھے۔