مظفرگڑھ(اے پی پی)مظفرگڑھ، ڈیرہ غایخان روڈ پر  ٹریکٹر ٹرالی  اور مسافر کوچ میں تصادم سے ایک شخص جابحق اور ایک زخمی ہو گیا ۔ ریسکیو کنٹرول روم مظفرگڑھ کے مطابق گزشتہ شب دیر گئے مظفرگڑھ، ڈیرہ غایخان روڈ پر چوک قریشی بائی پاس کے قریب ایک ٹریکٹر ٹرالی اوورٹیک کرتے ہوئے مخالف سمت سے اسلام آباد سے ڈیرہ غازیخان جانے والی مسافر کوچ سے ٹکرا گئی،اس کے نتیجے میں ٹریکٹر ٹرالی کا ڈرائیور تنویر ولد عبدالرشید موقع پر جاں بحق ہو گیا جبکہ مسافر کوچ کا 56 سالہ ڈرائیور جام عابد حسین ولد جام اللہ بخش شدید زخمی ہو گیا۔اطلاع ملنے پر ریسکیو کنٹرول روم مظفرگڑھ نے فورا قریبی پوائنٹس بصیرہ اور گجرات سے ایک ایک ایمبولینس جبکہ سنٹرل اسٹیشن مظفر گڑھ سے ریسکیو وہیکل کو جائے حادثہ پر روانہ کروا دیا اور پولیس کنٹرول کو بھی اطلاع کر دیا،ریسکیو سٹاف نے جائے حادثہ پر پہنچ کر مسافر کوچ کے زخمی ہونے والے ڈرائیور کو موقع پر ابتدائی طبی امداد فراہم کرنے کے بعد اور موقع پر جاں بحق ٹریکٹر ٹرالی ڈرائیور کی نعش کوآر ایچ سی ہسپتال بصیرہ منتقل کر دیا ہے،عینی شاہدین کے مطابق حادثہ ٹریکٹر ٹرالی ڈرائیور کی تیزرفتاری اور لاپرواہی کے باعث پیش آیا ہے، پولیس تھانہ چوک قریشی نے  ضابطے کی کارروائی شروع کر دی ہے۔