فوج الیکشن میں ہو تو دھاندلی نہیں ہو گی‘ امن بھی رہے گا: خورشید شاہ 

لاہور (نوائے وقت رپورٹ) سابق وفاقی وزیر و رہنما پیپلز پارٹی خورشید شاہ نے سکھر میں  کاغذات نامزدگی کی سکروٹنی کے بعد میڈیا سے گفتگو کرتے ہوئے انہوں نے کہا کہ ہم صرف وقت پر انتخابات چاہتے ہیں، انتخابات میں عوام کو سرپرائز دیں گے، لیول پلیئنگ فیلڈ ملے یا نہ ملے جو فیلڈ ملی ہے اسی پر کھیلیں گے، لیول پلیئنگ فیلڈ کے حوالے سے قیادت نے جو بات ریکارڈ کرانی تھی وہ کروا چکی ہے۔ انہوں نے کہا کہ عدلیہ اور دیگر ادارے موجود ہیں اور 8 فروری کی تاریخ تو خود عدلیہ نے دی ہے، ملک میں الیکشن ہوں گے تو سکیورٹی کا مسئلہ خود بخود حل ہوجائے گا، پاک فوج کو الیکشن میں ہونا چاہیے، فوج ہوگی تو امن و امان ہوگا اور دھاندلی نہیں ہوگی، پاک فوج وہ ادارہ ہے جس پر پوری قوم کا اعتماد ہے۔