کراچی میں آج بھی دہشتگرد معصوم شہریوں کو بربریت کا نشانہ بناتے رہے، مختلف واقعات میں خاتون سمیت مزید نوافراد کو موت کے گھاٹ اتاردیا گیا۔

تازہ ترین واقعہ جامع کلاتھ مارکیٹ میں پیش آیا جہاں نامعلوم افراد نے ایک شخص کو گولیاں مارکر قتل کردیا،ائیرپورٹ کے علاقے چھوٹا گیٹ سے ایک شخص کی تشدد زدہ لاش برآمد ہوئی، مقتول کی شناخت ونود کے نام سے کی گئی ہے، پولیس نے واقعہ کوذاتی دشمنی قراردیا ہے۔ ادھربلدیہ ٹاؤن سعید آباد میں نامعلوم افراد کی فائرنگ سے ایک شخص جاں بحق ہوگیا تاہم مقتول کی شناخت نہیں ہوسکی۔پریڈی تھانہ کی حدود میں نامعلوم افراد کی فائرنگ سے عمران نامی شخص زخمی ہوگیا جسے طبی امداد کے لیے ہسپتال منتقل کیا گیا جہاں وہ دوران علاج دم توڑ گیا پولیس کے مطابق مقتول کا تعلق مذہبی جماعت سے تھا۔ سولجر بازار میں بھی فائرنگ سے قراۃ العین نامی خاتون جابحق ہوگئی جبکہ کیماڑی کچھی پاڑہ مسان چوک پر نامعلوم افراد نے فائرنگ کرکے ایک شخص کوموت کے گھاٹ اتار دیا۔لانڈھی کے علاقےمظفرآباد کالونی میں بھی فائرنگ سے ایک شخص ہلاک ہوگیا،مقتول کی شناخت گل رحمان کے نام سے کی گئی۔ دوسری جانب ایسٹ اور ویسٹ زون پولیس نے گزشتہ چوبیس گھنٹوں کے دوران شہر کے مخلتف علاقوں میں کارروائی کرتے ہوئے ایک سو بائیس ملزمان کوگرفتارکرکے ان کے قبضے سے اسلحہ برآمد کرلیا۔