حامد خان پہلوا ن نے رستم زمان گاما پہلوان دنگل کا ٹائٹل جیت لیا

لاہور(سپورٹس رپورٹر) ملتان کے حامد خان پہلوا ن نے لاہور کے شہوار پہلوان کو چت کر کے رستم زمان گاما پہلوان دنگل کا ٹائٹل جیت لیا۔ پنجاب سٹیڈیم میں منعقد ہو نے والے دنگل میں دونوں پہلوانوں کے درمیان مقابلہ پچاس منٹ تک جاری رہا۔ دونوں پہلوان نصف گھنٹہ تک زور آزمائی کرتے رہے مگر کوئی فیصلہ نہ ہو سکا جس کے بعدمنتظمین نے دونوں پہلوانوں کو پوائنٹس کی کشتی شروع کرنے کے لئے کچھ وقت دیا اور پانچ منٹ میں ہی حامد پہلوان نے زور لگاتے ہوئے شہوارپہلوان کو گردن سے دبوچ کر پیچھے دھکیلا اور شہوار پہلوان کے پاوں اکھڑ گئے جس پر حامد پہلوان نے موقع سے فائدہ اٹھاتے ہوئے شہوار پہلوان کو چت کر دیا۔ فاتح پہلوان حامد پہلوان کو ایک لاکھ روپے نقد انعام اور گرز انعام میں دیا گیا جبکہ رنز اپ پلوان شہوار خان کو پچاس ہزار روپے نقد انعام دیا گیا۔ دنگل میں ٹائٹل کشتی کے علاوہ دیگر شہروں سے آئے ہوئے پہلوانوں کے درمیان چھوٹے مقابلے بھی منعقد ہوئے۔