بلیک لسٹنگ کا خطرہ ٹل چکا، فیٹف کے ایکشن پلان کو پورا کرینگے . حماد اظہر

وفاقی وزیر برائے صنعت و پیداوار حماد اظہر نے کہا ہے کہ بلیک لسٹنگ کا خطرہ ٹل چکا ہے، فیٹف کے ایکشن پلان کو پورا کریں گے،بھارت نے پاکستان کے خلاف کھیلنے کی کوشش کی اور بے نقاب ہوا ۔وفاقی دارالحکومت میں پریس کانفرنس کرتے ہوئے انہوں نے کہا کہ آج سے 2 سال پہلے ہم ایف اے ٹی ایف کے 2 نکات پر تھے، آج 24 نکات پر آگئے ہیں، پہلا ہدف تھا پاکستان کو بلیک لسٹ سے روکا جائے، الحمداللہ وہ ہدف حاصل کیا۔انہوں نے بتایا فیٹف نے کہا ہے کہ بلیک لسٹنگ پاکستان کے لیے اب آپشن نہیں رہا، اب فیٹف بھی کہہ رہا ہے کہ پاکستان 90 فیصد اہداف پورے کر چکا ہے، ٹیرر فنانسنگ کے بارے میں وکلا اور ججز کی ٹریننگ کریں گے، تین اہداف رہ گئے ہیں، وہ بھی جلد پورے کرلیں گے۔انہوں نے کہا کہ ہمارے پاس آپشن تھا کہ کورونا میں نہ رپورٹ کریں لیکن کورونا کے سخت حالات میں بھی پاکستان نے اپنے اہداف پورے کیے، پاکستان دنیا کے مشکل ترین ٹاسک پر 90 فیصد عمل درآمد کرچکا ہے، سخت حالات کے باوجود پاکستان نے مثالی کام کیا ہے۔ انہوں نے کہا قوم کو یقین دلانا چاہتے ہیں کہ پاکستان سے بلیک لسٹنگ کا خطرہ ٹل چکا ہے، ہم فیٹف کے ایکشن پلان کو پورا کریں گے، کوشش ہے جون تک 27 نکات پورے کر لیں۔انہوں نے کہا کہ فیٹف میں بھارت نے اپنے مذموم عزائم استعمال کرنے کی کوشش کی، بھارت نے پاکستان کے خلاف کھیلنے کی کوشش کی اور بے نقاب ہوا، دہشت گردی کی فنانسنگ میں بھارت اب خود بے نقاب ہو رہا ہے۔انہوں نے کہا کہ دہشت گردی سے فنانسنگ کا تعلق ہے، اور دہشت گردی سے متعلق فنانسنگ پر جزوی عمل درآمد ہو چکا ہے۔انہوں نے کہا کہ گرے لسٹ کے باعث پاکستان پر کوئی پابندیاں عائد نہیں ہوئیں، باقی 3 نکات میں غیر سرکاری فلاحی تنظیموں (این جی اوز)کی ریگولیشن شامل ہے، باقی 3 نکات پر عمل اور ٹیرر فنانسگ روکنے کے لیے مزید سخت اقدام کرنا ہوں گے۔انہوں نے کہا کہ پاکستان دہشت گردوں کی مالی معاونت کی تفتیش کو مضبوط کرے گا، ہمیں دہشت گردوں کی مالی معاونت کے خلاف تفتیش کے ٹھوس نتائج اور کالعدم تنظیموں کے افراد کے خلاف مالی پابندیوں پر عمل درآمد یقینی بنانا ہو گا،ایف اے ٹی ایف پلان مکمل ہونے پر پوری دنیا میں پاکستان کو مختلف نظر سے دیکھا جا رہا ہے۔