ساہیوال+ کسوال (نمائندہ نوائے وقت+ نامہ نگاران) ساہیوال اور کسوال میں ٹریفک حادثات میں 4 افراد جاں بحق جبکہ 4شدید زخمی ہو گئے۔ تفصیلات کے مطابق ساہیوال میں باراتی کار ٹرالر سے ٹکرا گئی جس میں 2 افراد جاں بحق ہو گئے جبکہ 3 شدید زخمی ہوگئے۔ بارات ساہیوال سے دیپالپور جا رہی تھی کہ قادر آباد کے قریب تیز رفتار باراتی کار بے قابو ہو کر ٹرالر کے نیچے گھس گئی جس کے نتیجہ میںکار میں سوار ایک باراتی شعیب موقع پر ہی جاں بحق ہو گیا جبکہ ایک زخمی احمد ہسپتال میں جاں بحق ہو گیا،3افراد شدید زخمی ہوئے جبکہ دیگر زخمیوں کی حالت نازک بتائی جاتی ہے۔ادھر کسووال کے قریب ٹرالے نے 3 نوجوانوں کو کچل ڈالا، مہر آباد کا رہائشی 17 سالہ بادل اس کا بہنوئی راجو اور ایک نامعلوم نوجوان موٹر سائیکل پر قریبی گائوں میں رشتہ داروں کو ملنے کیلئے جارہے تھے کہ الغنی پٹرول پمپ کے قریب رکشہ سے ٹکراگئے، سڑک پر گرتے ہی تینوں موٹر سائیکل سوار پیچھے سے آنے والے ٹرالر کے نیچے آگئے۔ دو نوجوان موقع پر ہی دم توڑ گئے جبکہ ایک نوجوان شدید زخمی ہوگیا، جسے ٹی ایچ کیو ہسپتال منتقل کیا لیکن زخمی نوجوان کو تشویشناک حالت میں ڈی ایچ کیو ہسپتال ساہیوال ریفر کردیا گیا۔