لاہور(سپورٹس رپورٹر) پاکستان سپر لیگ کے بارہویں میچ میں پشاور زلمی نے دفاعی چیمپئن لاہور قلندرز کو 8 رنز سے شکست دیدی۔یہ لاہور قلندرز کی رواں پی ایس ایل میں مسلسل پانچویں شکست ہے۔لاہور کے قذافی سٹیڈیم میں کھیلے گئے میچ میں لاہور قلندرز کے کپتان شاہین آفریدی نے ٹاس جیت کر پشاور زلمی کو بیٹنگ کی دعوت دیدی۔لاہور کی دعوت پر پہلے بیٹنگ کرتے ہوئے پشاور زلمی نے 4 وکٹوں پر 211 رنز بنائے۔اوپنر بابر اور صائم ایوب کے درمیان 136 رنز کی شاندار شراکت قائم ہوئی۔ بابر اعظم 48 اور صائم ایوب 88 رنز بناکر نمایاں رہے۔ رومین پاؤل نے 20 گیندوں پر 46 رنز کی اننگز کھیلی، آصف علی 6 رنز بناکر آؤٹ ہوئے جبکہ محمد حارث 12 اور والٹر 2 رنز بناکر ناقابل شکست رہے۔ شاہین آفریدی نے 3 اور جہانداد خان نے ایک وکٹ حاصل کی۔ لاہور قلندرز کی ٹیم6وکٹوں پر 203 رنز بناسکی۔ وین ڈر ڈوسن نے پی ایس ایل 9 کی پہلی سنچری سکور کی ان کی 105 رنز کی ناٹ آؤٹ اننگز بھی قلندرز کو پہلی کامیابی نہ دلواسکی۔شائی ہوپ 29 ، احسن حفیظ 20 اور صاحبزادہ فرحان نے 15 رنز بنائے، جہانداد خان 13 ، فخر زمان 4 اور سکندر رضا ایک رن بناسکے۔ نوین الحق نے 2 ‘لیوک ووڈ ، پاول ولٹر اور سلمان ارشاد نے ایک ایک وکٹ حاصل کی۔صائم ایوب کو میچ بہترین کھلاڑی قرار دیا گیا۔ لاہور قلندرز کو 5 میچز میں مسلسل شکست کا سامنا کرنا پڑا۔پشاور زلمی نے اب تک4 میچز کھیلیں ہیں جس میں اسے 2 میں شکست اور 2  میں کامیابی ملی۔ گیارہویں میچ میں ملتان سلطانز نے کوئٹہ گلیڈی ایٹرز کو 13 رنز سے شکست دیدی۔ملتان کرکٹ سٹیڈیم میں کھیلے جانیوالے میچ میں کوئٹہ گلیڈی ایٹرز نے ٹاس جیت کر فیلڈنگ کا فیصلہ کیا۔سلطانز نے 4 وکٹوں پر 180 رنز بنائے۔محمد رضوان 51 اور ریزا ہینڈرکس 72 رنز بنا کر نمایاں رہے، اسامہ خان 15 رنز اور افتخار احمد صفر پر پویلین لوٹے جبکہ طیب طاہر 35 رنز بنا کر ناقابل شکست رہے۔ محمد عامر نے 2 جبکہ ابرار احمد اور اکیل حسین کے حصے میں ایک ایک وکٹ آئی۔ کوئٹہ گلیڈی ایٹرز 9 وکٹ پر 167 رنز بناسکی۔خواجہ نافع 36 ‘کپتان رائیلی روسو  30 ، سعود شکیل 24 اور شرفین ردرفورڈ 21 ‘ جیسن رائے اور محمد عامر نے 12، 12 رنز بناکر نمایاں رہے۔محمد علی اور ڈیوڈ ولی نے تین تین وکٹیں لیں، آفتاب ابراہیم دو اور اسامہ میر نے ایک کھلاڑی کو آؤٹ کیا۔ملتان سلطانز کے محمد علی کو میچ کا بہترین کھلاڑی قرار دیا گیا۔