چولستان ڈیزرٹ ریلی ‘کھیلوں کے مقابلے ‘ کلچرل نائٹ کااہتمام

بہاول پور(نامہ نگار)19ویںانٹرنیشنل چولستان ڈیزرٹ ریلی کے موقع پر دلوش سٹیڈیم چولستان قلعہ ڈیراور کے مقام پر کلچرل نائٹ کا اہتمام کیا گیا۔ اس موقع پرکمشنر بہاول پورڈویژن ڈاکٹر احتشام انور، میاں محمد عثمان عباسی، ایم ڈی ٹی ڈی سی پی حمیرا اکرام ،جی ایم آپریشن ٹی ڈی سی پی واحد ارجمند اورانٹرنیشنل چولستان ڈیزرٹ ریلی میں حصہ لینے والے ریسرز سمیت انتظامی محکموں کے افسران اور شائقین جیپ ریلی کی کثیر تعداد موجود تھی۔ کلچرل نائٹ میں  معروف پاکستانی گلوکارعارف لوہارسمیت مقامی چولستانی گلوکاروں نے گیت پیش کئے۔چولستان ڈیزرٹ ریلی کے موقع پر روایتی کھیلوں کے مقابلوں کے ساتھ ساتھ کلچرل سرگرمیاں جاری ہیں۔ ڈپٹی کمشنر ظہیر انور جپہ کی ہدایت کے مطابق دلوش سٹیڈیم چولستان میں ضلع کونسل بہاول پور اور ڈسٹرکٹ سپورٹس ڈیپارٹمنٹ کے زیر اہتمام مختلف کھیلوں کے مقابلے منعقد کئے گئے۔ اس موقع پر دلوش سٹیڈیم میں فیصل آباد ڈویژن اور بہاول پور ڈویژن کی کبڈی ٹیموں کے مابین کبڈی میچ بھی کھیلا گیا۔کبڈی کے کھلاڑیوں نے جوش و خروش سے اس مقابلے میں حصہ لیا اور بہترین نظم و ضبط کا مظاہرہ کرتے ہوئے شاندار کھیل پیش کیا۔