لاہور (نامہ نگار) ڈاکوؤں اور چوروں نے متعدد شہریوں سے لاکھوں روپے مالیت کی نقدی، زیورات، موبائل فون، موٹر سائیکلیں، گاڑیاں اور دیگر سامان لوٹ لیا۔ تفصیلات کے مطابق ڈاکوؤں نے سندرکے علاقے میں محمد ابراہیم کے گھر میں گھس کر اہلخانہ کو اسلحہ کے زور پر یرغمال بنا کر ساڑھے6 لاکھ روپے مالیت کی نقدی، زیورات، موبائل فون، شمالی چھاؤنی کے علاقے میں عباس سے ایک لاکھ 60 ہزار روپے اور موبائل فون، ہربنس پورہ کے علاقے میں سہیل سے گن پوائنٹ پر ڈیڑھ لاکھ روپے اور موبائل فون، بادامی باغ میں ارشاد سے 80 ہزار روپے اور موبائل فون، چوہنگ میں وارث سے گن پوائنٹ پر 54ہزار روپے اور موبائل فون، اسلام پورہ میں فہیم سے 30ہزار روپے نقدی اور موبائل فون، ریس کورس کے علاقے میں فرحان سے گن پوائنٹ پر 20ہزار روپے اور موبائل فون، گڑھی شاہو کے علاقے میں بابر سے 15ہزار روپے اور موبائل فون، ٹاؤن شپ کے علاقے میں زاہد سے 7ہزار روپے نقدی اور موبائل فون لوٹ لیا۔ چوروں نے مغلپورہ کے علاقے میں ضیاء کے گھر کے تالے توڑ کر 4لاکھ 70 ہزار روپے مالیت کی نقدی، زیورات اور دیگر سامان چوری کر لیا اور فرار ہوگئے۔ چوروں نے گلبرگ، ڈیفنس اور ماڈل ٹاؤن کے علاقوں میں سے3 گاڑیاں، مسلم ٹاؤن کے علاقے میں سے رکشہ جبکہ لٹن روڈ، قلعہ گجر سنگھ، بادامی باغ، سندر، کوٹ لکھپت، مناواں،کاہنہ اور باغبانپورہ کے علاقوں سے 8 موٹر سائیکلیں چوری کر لیں۔ نشتر کالونی کے علاقے میں رنگ روڈ پولیس وردی میں ملبوس ڈاکوؤں نے بیرون ملک سے آئی ندیم کی فیملی سے ڈکیتی کی واردات میں 33 لاکھ روپے مالیت کی ملکی وغیر ملکی کرنسی، زیورات،موبائل فون و دیگر سامان لوٹ لیا اور فرار ہوگئے ہیں۔ ڈاکوؤں کی گاڑی پر پولیس لائٹ بھی لگی ہوئی تھی۔ پولیس نے متاثرہ ندیم کے بیان پر مقدمہ درج کر لیا ہے۔ شہری بیرون ملک سے آئی اپنی فیملی کو ائیرپورٹ سے لیکر گھر جا رہا تھاکہ ڈاکوؤں کی واردات کا نشانہ بن گئے۔