شاہ براردرز کا کوئی دبائو نہیں ‘ہدف قومی ٹیم کیلئے کھیلنا ہے : حنین شاہ 

لاہور(سپورٹس رپورٹر)اسلام آباد یونائیٹڈ کی نمائندگی کرنے والے فاسٹ بائولر حنین شاہ نے کہاہے کہ مجھ سمیت بھائی نسیم شاہ اور عبید شاہ نے شاہ برادرز کا دبائو نہیں لینا بلکہ تینوں نے ٹیم کیلئے اچھا کرنا ہے۔ اس ٹیم کی جانب سے پی ایس ایل ڈیبیو کیا ہے جس کیلئے میں بہت پرجوش ہوں، ٹیم مینجمنٹ کی جانب سے بہت سپورٹ مل رہی ہے۔  شاہ برادرز کہلانے سے ہم تینوں بھائی خود کو متحرک کریں گے۔ نسیم، عبید اور مجھ سے جو توقعات ہیں پوری کرنے کی کوشش کریں گے۔ نسیم شاہ سے بہت کچھ سیکھنے کا موقع ملتا ہے وہ اس وقت پاکستان کا سپر سٹار ہے، جب بھی کوئی مشکل پیش آتی ہے نسیم سے پوچھتے ہیں، وہ کرکٹ پر زیادہ بات نہیں کرتا، ڈسپلن اور دیگر چیزوں میں زیادہ سمجھاتا ہے۔ تینوں بھائی شروع ہی سے بائولنگ کرتے ہیں، فاسٹ بائولر نیچرل ہوتے ہیں جب بھائی کھیل رہا ہوتو مزید آسان ہو جاتا ہے۔ ہر کرکٹر کا خواب ہوتا ہے کہ وہ ملک کی نمائندگی کرے اور جتنا ہو سکے پرفارم کرے، میرا بھی یہی ہدف ہے، ہم تینوں اپنی اپنی جگہ محنت کر رہے ہیں ہم تینوں کا گول پاکستان کیلئے کھیلنا ہے،ہم تینوں لمبے عرصے تک پاکستان کیلئے خدمات انجام دینا چاہتے ہیں۔اگر ہم تینوں کی یہی خواہش ہے کہ ایک ساتھ پاکستان کیلئے کھیلیں، اگر ہم فوکس رہے تو ضرور کھیلیں گے۔