محبت اہلبیت اور صحابہ لازم وملزوم ہیں:اشرف آصف جلالی

لاہور (سپیشل رپورٹر ) تحریک لبیک یا رسول اللہ صلی اللہ علیک وسلم کے زیر اہتمام مرکز صراط مستقیم تاج باغ لاہور میں علماء کنونشن کا انعقاد کیا گیا۔ تحریک لبیک یارسول اللہ صلی اللہ علیک وسلم کے سربراہ ڈاکٹر محمد اشرف آصف جلالی نے علماء کنونشن کا اعلامیہ بیان کرتے ہوئے کہا یکم فروری نماز عشاء کے بعد ایوان اقبال لاہور میں تاریخی محبت اہل بیتؓ سیمینار کا انعقاد کیا جائے گا۔ محبت اہل بیت ؓ سیمینار خاندان رسولؐ کی عظمتوں کو اْجاگر کرنے کے لحاظ سے تاریخی کردار ادا کرے گا۔ذکر اہل بیت اطہار ؓ کی برکت سے ماحول میں چھائے مایوسیوں کے سائے چھٹ جائیں گے۔ آل محمدؐ کی یاد مردہ دلوں کے لیے حیات جاوداں اور مسرتوں کی کہکشاں ہے۔اس حقیقت کو اجاگر کیا جائے گا کہ محبت اہل بیت ؓکی فرضیت کا سبب نسبتِ ذاتِ رسولؐ ہے۔ چونکہ محبت صحابہ رضی اللہ عنہم بھی نسبتِ رسول ؐ کی وجہ سے لازم ہے۔ چنانچہ محبت اہل بیت ؓ اور محبت صحابہ آپس میں لازم و ملزوم ہیں اور ان کی قبولیت کے لیے بیک وقت جمع ہونا ضروری ہے۔