دورہ ویسٹ انڈیز،شیڈول تبدیل، ایک ٹی ٹونٹی کم، پہلا مقابلہ پرسوں ہوگا

لاہور(سپورٹس رپورٹر )پاکستان اور ویسٹ انڈیز کے مابین سیریز کا شیڈول تبدیلی کردیا گیا ۔دونوں ٹیموں کے مابین اب پانچ کی بجائے چار ٹی ٹونٹی انٹرنیشنل میچز کھیلے جائیں گے۔ابتدائی طور پر 27 جولائی کو شیڈول پہلا ٹی ٹونٹی انٹرنیشنل میچ منسوخ کردیا گیا ہے ۔اب ٹی ٹونٹی سیریز کا پہلا میچ 28 جولائی کو کھیلا جائے گا۔دیگر میچز کے شیڈول میں کوئی تبدیلی نہیں کی گئی۔ میچ پاکستانی وقت کے مطابق رات 8بجے شروع ہو گا۔ قومی کرکٹرز نے مسلسل دو روز پریکٹس کے بعد گزشتہ روز آرام کو ترجیح دی ۔ کھلاڑی کل کے میچ کی تیاری آج دوبارہ کرینگے ۔ پاکستان ٹیسٹ سکواڈ کے ارکان آج ویسٹ انڈیز روانہ ہوں گے، قومی ٹیسٹ سکواڈ کے 11 ارکان براستہ لندن بارباڈوس پہنچیں گے۔ٹیسٹ سکواڈ کے ارکان کی گزشتہ روز تیسری کرونا ٹیسٹنگ بھی منفی آئی ہے، 11 کھلاڑیوں میں عابد علی، اظہرعلی، فواد عالم ، عمران بٹ، محمد عباس سمیت نسیم شاہ، نعمان علی، ساجد خان، شاہنواز دھانی، یاسر شاہ اور زاہد محمود شامل ہیں۔پاکستان اور ویسٹ انڈیز کے درمیان 2 ٹیسٹ میچز کی سیریز شیڈول ہے۔پی سی بی کے مطابق لاہور کے نجی ہوٹل میں بنے بائیو سیکورببل میں موجود اظہر علی، محمد عباس سمیت 11 کھلاڑیوں کا تیسرا اور آخری کوویڈ ٹیسٹ بھی کلیئر ہو گیا، قومی ٹیسٹ پلیئرز کی گزشتہ روز تیسری کرونا ٹیسٹنگ کی گئی تھی۔