میونسپل کمیٹی پتوکی شعبہ ڈسپوزل کی کئی موٹریں خراب‘ نکاسی آب سسٹم تباہ

پتوکی(نمائندہ نوائے وقت) میونسپل کمیٹی پتوکی شعبہ ڈسپوزل کی 5 میں سے 4 موٹریں خراب سیوریج نکاسی بری طرح متاثر گلیوں بازاروں میں سیوریج کا پانی کھڑا ہو گیا۔ تفصیلات کے مطابق پتوکی سیوریج کی نکاسی کیلئے شعبہ ڈسپوزل میں 100 ہارس پاور کی دو اور 50 ہارس پاور کی تین موٹریں لگائی گئی ہیں جن کے چلنے سے شہر بھر کی سیوریج کے پانی کی نکاسی ممکن ہے جبکہ میونسپل حکام کی عدم دلچسپی کے باعث کئی موٹریں گزشتہ کئی ہفتوں سے خراب ہیں جن کے خراب ہونے کے باعث مون سون کے دونوں میں سیوریج کے پانی نکاسی بری طرح متاثر ہوگئی ۔ شہریوں نے نگران وزیر اعلیٰ پنجاب، چیف سیکرٹری پنجاب،سیکرٹری لوکل گورنمنٹ بورڈ پنجاب اور ڈپٹی کمشنر قصور سے مطالبہ کیا ہے کہ موٹروں کی فوری مرمت کرائی جائے ۔ اس بابت چیف افسر میونسپل کمیٹی پتوکی ملک خالد محمود کا کہنا ہے کہ موٹروں کی مرمت کیلئے اقدامات کیے جارہے ہیں جلد مرمت ہوتے ہی عوام کو سروسز فراہم کی جائیں گی۔