تائیوان میں سمندری طوفان، بجلی بند، پروازیں منسوخ، کارگو جہاز ڈوب گیا، 3 افراد ہلاک، 266 زخمی

منیلا(این این آئی)سمندری طوفان گیمی فلپائن کے بعد تائیوان سے ٹکرا گیا ہے‘ سمندری طوفان گیمی کے باعث تائیوان میں بارشوں کا سلسلہ جاری ہے۔غیر ملکی خبر رساں ادارے کے مطابق تائیوان میں طوفان کے باعث مختلف حادثات میں 3افراد ہلاک اور266 زخمی ہو گئے ۔تائیوان میں مسلسل دوسرے روز سکول، دفاتر اور کاروبار بند جبکہ ٹرین سروس بھی معطل رہی۔تمام ڈومیسٹک پروازیں اور 185 بین الاقوامی پروازیں منسوخ کر دی گئی ہیں جبکہ تقریبا 5 لاکھ گھروں کی بجلی منقطع ہے۔حکام کے مطابق تائیوان کے سمندر میں تنزانیا کے پرچم والا کارگو جہاز ڈوب گیا، جہاز ڈوبنے سے عملے کے 9 افراد لاپتہ ہیں جن کی تلاش جاری ہے۔فلپائن کے سمنرر میں ٹینکر ڈوبنے سے تیل سمندر کی سطح پر پھیل گیا، عملے کے 16 افراد کو بچالیا گیا جبکہ ایک کی تلاش جاری ہے۔دوسری جانب چین کے جانب بڑھنے والے طوفان کے باعث صوبے فوجیان اور زیجیانگ میں بارشوں‘ سیلاب کے الرٹ جاری کر دئیے گئے ۔ متاثرہ علاقے سے 8000 سے زائد افراد کومحفوظ مقامات پر منتقل کردیاگیا ۔