پاکستان پیپلز پارٹی کی سینیٹر شیری رحمان نے کہا ہے کہ پاکستان اور جمہوریت کو مستحکم کرنے میں صدر زرداری کا کردار قابل تعریف ہے۔ صدر پاکستان آصف علی زرداری کو جنم دن کی مبارکباد پیش کرتے ہوئے بیان میں شیری رحمان نے کہا کہ پاکستان کے سیاسی منظر نامے میں ان کا کردار ہمیشہ مرکزی اور انتہائی اہم رہا ہے، انتقامی کارروائیوں کی وجہ سے جیل میں ایک دہائی سے زیادہ کا عرصہ گزارنے کے باوجود وہ جمہوریت اور آئین کی حکمرانی کیلئے پرعزم ہیں،پاکستان اور جمہوریت کو مستحکم کرنے میں صدر زرداری کا سیاسی کردار قابل تعریف ہے، اقتدار میں آ کر انہوں نے صدر کے اختیارات پارلیمنٹ کو منتقل کئے۔ شیری رحمان نے کہا کہ صدر زرداری نے 18 ویں ترمیم کے ذریعے صوبوں کو خودمختار بنایا، خیبرپختونخوا کو پہچان دی اور بلوچستان کو آغاز حقوق بلوچستان دیا، ان کی قیادت اور وژن کی وجہ سے پاکستان کا جمہوری سفر جاری ہے۔ پی پی رہنما نے کہا کہ صدر زرداری کے جنم دن کے موقع پر میں ان کی صحت، خوشیوں اور کامیابیوں کیلئے دعاگو ہوں۔