ذرائع کے مطابق بم ایک موٹر سائیکل میں نصب تھا جسے پولیس چوکی کے قریب اڑادیاگیا۔ دھماکے سے چار پولیس اہلکاروں سمیت آٹھ افراد زخمی ہوگئے ۔ زخمیوں میں پولیس اہلکار خادم حسین ، قیصر عباس ، فیصل شہزاد اورسجاد شامل ہیں، دھماکے میں دو حوالاتی دانش اور اصغر اور دو شہری خالد اور ناصر بھی زخمی ہوئے ۔زخمیوں میں دو پولیس اہلکاروں خاد م حسین اور سجاد کی حالت انتہائی تشویشناک بتائی جاتی ہے۔ دھماکے کے بعد ریسکیو اہلکاروں نے زخمیوں کو نشتر ہسپتال منتقل کیا۔دھماکے کی اطلاع ملتے ہی سی پی او عامر ذوالفقار، ڈی سی او زاہد اخترزمان اور صوبائی وزیر مذہبی امور حاجی احسان اللہ موقع پر پہنچ گئے۔ سی پی او ملتان عامر ذوالفقار نے میڈیا کو بتایا کہ دھماکہ خود کش ہونے کی تصدیق نہیں ہوسکی ۔ذرائع کے مطابق دھماکے میں آٹھ سے دس کلو گرام بارودی مواد استعمال کیا گیا۔