یوروگوئے کو شکست دیکر ٹاپ ایٹ کیلئے کوالیفائی کرینگے : اوسپینا ڈیوڈ

برازیلیا (اے پی پی) کولمبیا کی ٹیم کے نامور گول کیپر اوسپینا ڈیوڈ نے کہا ہے کہ انکی ٹیم مکمل طور پر فٹ اور بھر پور فارم میں ہے اور میگاایونٹ کے پری کوارٹر فائنل میچ میں یوروگوئے کی ٹیم کو شکست دیکر کوارٹر فائنل کے لیے کوالیفائی کریگی۔  اوسپینا ڈیوڈ نے کہا ہے کہ وہ میگا ایونٹ میں اب تک کی اپنی ٹیم کی کارکردگی سے مطمئن ہیں، انہوں نے کہا کہ وہ اپنی ٹیم کے دوسرا رائونڈ کوالیفائی کرنے پر بہت خوش ہیں۔، انہوں نے کہا کہ انکی ٹیم فیفا ورلڈ کپ 2014ء کے پری کوارٹر فائنل میں مربوط حکمت عملی کے تحت میدان میں جیت کے لیے اترے گی۔ اوسپینا ڈیوڈ نے کہا کہ ٹیم نے گروپ میچوں میں جو کارکردگی کا مظاہرہ کیا ہے اگر ایسے کرنے میں ہی مین رائونڈ میں بھی  کامیاب ہوگئی تو اس کو فائنل تک پہنچنے میں کوئی نہیں ورک سکتا۔ انہوں نے کہا کہ  وہ اپنی ٹیم کی کارکردگی سے مطمئن ہیں۔  انہوں نے کہا کہ  اس وقت ہماری ٹیم عالمی رینکنگ میں آٹھویں نمبر پر پہنچ گئی ہے۔  انہوں نے کہا کہ ورلڈ کپ کا ہر میچ فائنل کی طرح اہم ہوتا ہے اسلئے انکی ٹیم کی کوشش ہوگی کہ وہ میگا ایونٹ کے دوسرے رائونڈ میں بھی عمدہ کھیل پیش کرتے ہوئے کامیابی حاصل کر سکے اور اس مقصد کے لیے ٹیم کے ہر کھلاڑی کو بہت سخت محنت کرنا ہوگی۔ واضح رہے کہ کولمبیا کی ٹیم چار مرتبہ میگاایونٹ میں شرکت کرچکی ہے تاہم  وہ ایک مرتبہ بھی کوئی ٹائٹل حاصل نہیں کرسکی۔ کولمبیا کی ٹیم اپنے گروپ سی میں سب سے زیادہ 9 پوائنٹس کے ساتھ سرفہرست رہی، اور اس نے اپنے گروپ کے تینوں میچوں میں کامیابی حاصل کی جبکہ یوروگوئے کی ٹیم دو مرتبہ میگا ایونٹ جیت چکی ہے اور پری کوارٹر فائنل میں پہنچ چکی ہے اور اس اعتبار سے توقع کی جارہی ہے کہ پری کوارٹر فائنل میں دونوں ٹیموں کے درمیان کانٹے دار مقابلہ ہوگا۔