پی پی کو کمزور سمجھنے والے احمقوں کی جنت میں رہتے ہیں:حاجی فلک شیر 

شیخوپورہ(نمائندہ نوائے وقت) پیپلز پارٹی کے ڈویژنل جنرل سیکرٹری حاجی فلک شیر ایڈووکیٹ نے کہا ہے کہ پیپلز پارٹی کو کمزور سمجھنے والے احمقوں کی جنت میں رہتے ہیں۔ پارٹی کے شریک چیئرمین سابق صدر آصف علی زرداری کی لاہور آمد اور سیاسی سرگرمیوں سے حکومتی حلقوں میں کھلبلی مچی ہوئی ہے بلاول ہاؤس میں آصف علی زرداری سے ملک اور پنجاب کے اہم سیاسی رہنماؤں کی ملاقاتوں نے حکمرانوں کی نیندیں حرام کردی ہیں، اپنے ایک بیان میں حاجی فلک شیر ایڈووکیٹ نے کہا کہ آصف علی زرداری کے دورہ لاہور سے مثبت سیاسی اثرات مرتب ہونگے تمام سیاسی مخالفین آصف علی زرداری کی سیاسی سوج بوجھ حکمت عملی اور فہم وفراصت سے خوفزدہ ہیں ان کے دورہ سے پیپلزپارٹی کو پنجاب میں دوبارہ اپنی کھوئی ہوئی سیاسی قوت بحال کرنے میں مدد ملے گی اورپیپلزپارٹی پنجاب میں بھی ماضی کی طرح ایک ناقابل شکست سیاسی قوت بن کر ابھرے گی، انہوں نے کہا کہ پیپلزپارٹی نے کبھی بھی حکومتوں کو غیر جمہوری غیر آئینی طریقے سے ہٹانے کی سازشوں میں حصہ نہیں لیا بلکہ پیپلزپارٹی کی حکومتوں کو ہمیشہ سازشوں کے ذریعے ختم کیا گیا۔