کراچی (پی پی آئی)دنیا کے خوبصورت اور پرکشش چہروں کی عالمی فہرست کے لیے رواں سال 3 پاکستانی اداکارئوں اور 2 اداکاروں کو نامزد کردیا گیا ہے۔دنیا کے خوبصورت اور پرکشش چہروں کی فہرست جاری کرنے والے برطانیہ کے خودمختار ادارے ’دی انڈیپینڈنٹ کرٹکس‘ اور ’ٹی سی کینڈلر‘ نے رواں برس کی نامزدگی فہرست جاری کردی ہے۔پی پی آئی کے مطابق مذکورہ ادارہ 1990 سے لے کر ہر سال دنیا کے خوبصورت اور پرکشش شخصیات کی فہرست جاری کرتا آرہا ہے اور رواں سال کی نامزدگی فہرست میں گزشتہ چند برسوں کی طرح اس بار بھی فواد خان اور عمران عباس جگہ بنانے میں کامیاب رہے۔اس فہرست کی نامزدگیوں کا اعلان ہر سال کے آغاز  میںکیا جاتا ہے، جب کہ کامیاب افراد کا اعلان سال کے آخر میں کیا جاتا ہے۔دنیا کے خوبصورت اور پرکشش شخصیات کی فہرست کے لیے رواں سال نامزد پاکستانی اداکارائوں میں عائزہ خان، سجل علی اور نیلم منیر شامل ہیں۔ادارے کی جانب سے عائزہ خان کی تصویر اپنے آفیشل انسٹاگرام اکائونٹ پر شیئر کرتے ہوئے کیپشن میں کہا گیا کہ ’ان خوبصورت لوگوں کو 2022 کے 100 پرکشش چہروں کی فہرست میں باضابطہ طور پر نامزد ہونے پر مبارکباد‘۔نامزد کی گئی دیگر شخصیات میں بھارت، ایران، ترکی، کوریا، جاپان، چین، امریکا، متحدہ عرب امارات، برطانیہ اور برازیل سمیت دیگر ممالک کی شوبز شخصیات شامل ہیں۔واضح رہے کہ عائزہ خان اور سجل علی کو گزشتہ سال بھی ماہرہ خان کے ساتھ 2021 کے خوبصورت چہروں کی فہرست میں نامزد کیا گیا تھا۔