لاہور(سپورٹس رپورٹر) الماتے میں جاری انٹرنیشنل میٹ میں پاکستان کے شجر عباس نے نیا قومی ریکارڈ بناڈالا۔شجر عباس نے سو میٹر ہیٹس میں 10.38 سکینڈز میں ریس مکمل کرکے ریکارڈ قائم کیا، اس سے پہلے اسلامک گیمز 2005 میں افضل بیگ نے سو میٹر کا فاصلہ 10.42 سکینڈز میں طے کرکے قومی ریکارڈ بنایا تھا۔ساہیوال سے تعلق رکھنے والے شجر عباس نے عمدہ کارکردگی کیساتھ فائنل مرحلے میں بھی جگہ بنالی ہے، شجرعباس نے اس سے پہلے ایران میں دو سومیٹر ریس میں بھی 20.91 سکینڈز کیساتھ ریکارڈ بنایا تھا۔دیگر کھلاڑیوں میں سے عبدالمعید نے چار سومیٹر فائنل کیلئے کوالیفائی کرلیا۔ شاہ نواز ڈسکس تھرو ، سہیل عامر پندرہ سو اور پانچ ہزارمیٹرمیں حصہ لیں گے، شہروز ہائی جمپ میں قسمت آزمائیں گے۔