ڈی آئی خان+ لاہور+ کراچی (نوائے وقت رپورٹ) ڈیرہ اسماعیل خان میں نامعلوم افراد کی فائرنگ سے ہیڈ کانسٹیبل شہید ہو گیا۔ ملزم فرار ہونے میں کامیاب ہو گئے۔ علاوہ ازیں آپریشن ردالفساد کے سلسلہ میں کارروائیوں کے دوران 68 افراد کو گرفتار کیا گیا، پشاور میں پشتخرہ اور ملحقہ علاقوں میں پولیس نے سرچ آپریشن کر کے 20 افراد کو پکڑا‘ 2 پستول، گولیاں اور منشیات برآمد ہوئی، پولیس کے مطابق کرایہ داری کے نامکمل کوائف پر 9 افراد کوگرفتار کیا گیا۔ حافظ آباد میں2 اشتہاریوں سمیت 12 ملزم گرفتار کئے گئے۔ لودھراں کے علاقے کوٹلہ علی دستی میں12مشتبہ افراد کوحراست میں لیا گیا اور 15گھروں کی تلاشی لی گئی۔ کلورکوٹ اور دریاخان کچے میں 24 مشتبہ افراد کو حراست میں لیا گیا۔ کراچی میں پولیس اور رینجرز نے ڈکیت گروہ سمیت18ملزموں کو گرفتار کرلیا۔