کراچی : چیئرمین پیپلز پارٹی بلاول بھٹو کی زیر قیادت حکومت مخالف ٹرین مارچ آج کراچی سے شروع ہوگا۔
تفصیلات کے مطابق بلاول بھٹو زرداری کی قیادت میں قافلہ صبح دس بجے کینٹ ریلوے اسٹیشن کراچی سے اندرون سندھ روانہ ہوگا۔ جیالوں نے کمر کس لی، تمام بڑے اسٹیشنوں پر دما دم مست قلندر ہوگا۔ جہاں کاروانِ بھٹو کا شاندار استقبال ہوگا۔
ذرائع کے مطابق ٹرین مارچ کے دوران چیئرمین پیپلز پارٹی بلاول بھٹو زرداری راستے میں 25 مقامات پر خطاب کریں گے۔بلاول بھٹو جیالوں کا لہو گرمائیں گے، ٹھٹھہ، جامشورو اور حیدرآباد اسٹیشنوں پر بڑے اجتماعات ہوں گے، رات آٹھ بجے قافلہ نواب شاہ پہنچے گا جہاں خطاب کے بعد قافلہ قیام کرے گا۔
بدھ کی صبح دس بجے ٹرین مارچ کے شرکا براستہ سکھر اسٹیشن لاڑکانہ کے لیے روانہ ہوں گے اور رات آٹھ بجے سرشاہنواز بھٹو ریلوے اسٹیشن لاڑکانہ میں بلاول بھٹو اختتامی تقریر کریں گے۔پارٹی ذرائع کے مطابق احتجاجی ٹرین دو دن میں کراچی سے لاڑکانہ پہنچے گی، پی پی کی تمام اضلاع میں ٹرین مارچ کے لئے رہنماؤں اور کارکنان کو ہدایات جاری کردی گئیں ہیں۔
