ایک تھیلا لینے والے خاندانوں کو 20 کلو آٹا بیک وقت ، 3 محکموں میں ایڈہاک بھرتی کی منظوری : پنجاب کابینہ 

لاہور+شیخوپورہ +فیروز والہ (نیوز رپورٹر+نامہ نگاران) نگران وزیراعلیٰ محسن نقوی کی زیرصدارت صوبائی کابینہ کے 11ویں اجلاس میں وفاقی و پنجاب حکومت کی جانب سے رمضان ریلیف پیکیج کے تحت مفت آٹے کی فراہمی کیلئے ایک اور بڑا فیصلہ کیا گیا۔ پنجاب کابینہ نے ایک آٹا تھیلا لینے والے تمام خاندانوں کیلئے بیک وقت 20کلو آٹا دینے کی منظوری دی۔ اس فیصلے کا اطلاق 29 مارچ سے ہو گا اور شہریوں کو با ربارسنٹرز کے چکر لگانے کی زحمت نہیں ہو گی۔ محسن نقوی نے کہا کہ صوبائی وزراءاور سیکرٹریز تسلسل کے ساتھ سنٹرز کے دورے جاری رکھیں اور اپنی رپورٹ وزیراعلیٰ آفس بھجوائیں۔ اجلاس میں رجسٹریشن کے عمل کو آسان بنانے کے حوالے سے مختلف تجاویز کاجائزہ لیا گیا۔ صوبائی وزراءاور اعلیٰ حکام پر مشتمل کمیٹی تشکیل دی گئی جو رجسٹریشن کے حوالے سے حتمی سفارشات پیش کرے گی۔ پنجاب کابینہ نے آٹے کی فراہمی کے عمل پر اطمینان کا اظہار کیا۔ کابینہ کو بریفنگ کے دوران بتایا گیا کہ اب تک تقریباً 70لاکھ سے زائد آٹا تھیلے مستحق افراد میں تقسیم کئے جا چکے ہیں۔ محسن نقوی نے کہا کہ اشیائے ضروریہ کی مقررہ نرخوں پر دستیابی یقینی بنانے کے لئے بازاروں اور مارکیٹوں کو بھی چیک کیا جائے اور پوری انتظامیہ اس ضمن میں متحرک رہے۔ محکمہ سپیشلائزڈ ہیلتھ کیئر اینڈ میڈیکل ایجوکیشن اور محکمہ پرائمری و سیکنڈری ہیلتھ کیئر میں ڈاکٹرز اور دیگر عملے کی ایڈہاک پر بھرتی کی منظوری دی گئی۔ پبلک ہیلتھ انجینئرنگ ڈیپارٹمنٹ اور سوشل ویلفیئر اور بیت المال کے کنٹریکٹ ملازمین کی مدت ملازمت میں توسیع کی منظوری دی گئی۔ سپیشل بچوں کیلئے سٹیٹ آف دی آرٹ آ ٹزم سینٹر کے قیام کیلئے سپیشلائزڈ ہیلتھ کیئر اینڈ میڈیکل ایجوکیشن ڈیپارٹمنٹ کی جوہر ٹاو¿ن میں اراضی محکمہ سپیشل ایجوکیشن کو منتقل کرنے کی منظوری دی گئی۔ چائلڈ پروٹیکشن بیوروکی کارکردگی پر عدم اطمینان کا اظہار کیا گیا اور فیصلہ کیا گیا کہ ادارے کی تنظیم نو کی جائے گی۔ کابینہ کو بریفنگ کے دوران بتایا گیا کہ چائلڈ پروٹیکشن بیورو کے سنٹرز میں 1050بچے موجود ہیں جبکہ ادارے کے عملے کی تعداد 750ہے۔ پنجاب کابینہ نے سوشل ویلفیئر اور بیت المال ڈیپارٹمنٹ اور لاہو ر انسٹی ٹیوٹ آف ہیلتھ سائنسز کے درمیان ایم او یو کی منظوری دی۔ کابینہ سٹینڈنگ کمیٹی برائے یونیورسل ہیلتھ انشورنس کے قیام کی منظوری دی گئی۔ صوبائی وزیر سپیشلائزڈ ہیلتھ کیئر اینڈ میڈیکل ایجوکیشن ڈاکٹر جاوید اکرم کمیٹی کے سربراہ ہوں گے جبکہ صوبائی وزیر صنعت ایس ایم تنویر کمیٹی کے کو چیئرمین ہوں گے۔ لاہور، فیصل آباد،راولپنڈی او رگوجرانوالہ کی ڈرگ کورٹ میں چیئرپرسن کی آسامیو ں پر تعیناتی کی منظوری دی گئی۔ علاوہ ازیں محسن نقوی نے شیخوپورہ کا اچانک دورہ کیا اور مختلف مقامات پر مفت آٹا پوائنٹس اور ڈسٹرکٹ ہیڈ کوارٹرز ہسپتال میں سہولیات کا جائزہ لیا۔ نگران وزیر اعلیٰ مفت آٹا پوائنٹس پر شہریوں میں گھل مل گئے۔ مفت آٹے کے حصول کے لئے موجود مستحق خواتین سے سہولیات کے متعلق دریافت کیا اور معمر خواتین کا ہاتھ تھام کر خود آٹا کاﺅنٹر پر لیجاتے رہے۔ نگران وزیر اعلی محسن نقوی نے آٹے کے حصول کے لیے آنے والی مستحق خواتین سے سروس ڈلیوری ٹائم کے حوالے سے بھی دریافت کیا۔ مفت آٹا مرکز پر موجود تمام خواتین نے سروس ڈیلیوری ٹائمنگ کو 3 سے 4 منٹ بتایا۔ محسن نقوی نے ڈپٹی کمشنر سرمد تیمور کے ہمراہ ڈسٹرکٹ ہیڈ کوارٹرز ہسپتال کی ایمرجنسی اور دیگر وارڈز کا بھی وزٹ کیا اور ہسپتال میں آئے ہوئے مریضوں اور ان کے لواحقین سے ہسپتال میں ملنے والی سہولیات کے بارے بھی پوچھا۔شیخوپورہ سے نمائندہ نوائے وقت/ نمائندہ خصوصی کے مطابق محسن نقوی سے خواتین نے ناقص انتظامات ہونے کی شکایات لگائی، جس پر وزیر اعلیٰ نے ضلعی انتظامیہ کے افسران کی باز پرس کی اور انہیں ہدایت کی کہ مفت آٹے کے کیلئے آنے والے لوگوں کے ساتھ اپنا رویہ مثبت رکھےں۔ شکایات کی صورت میں افسران کے خلاف کارروائی کی جائے گی۔ وزیر اعلیٰ نے ڈی ایچ کیوہسپتال کی ایمرجنسی ٹراما سینٹر کا بھی دورہ کیا اور وہاں مریضوں اور ان کے لواحقین سے مفت ادویات اور طبی سہولیات کے بارے میں دریافت کیا تو وہاں بھی لوگوں نے شکایات کے انبار لگا دیئے۔ جس پر وزیر اعلیٰ نے میڈیکل سپریٹنڈنٹ کی سررنش بھی کی۔ اس مو قع پر ہسپتال میں ایم آئی آئی مشین اور اینجیو پلاسٹی کے شعبہ کے فوری قیام کے احکامات بھی جاری کئے۔