لاہور (کامرس رپورٹر) مارکیٹ کمیٹی کے مطابق تھوک منڈیوں میں گزشتہ روز زیادہ تر سبزیوں کی قیمتوں میں کمی آئی لیکن پرچون سطح پر ان کے نرخوں میں کو ئی کمی نہیں ہوئی جبکہ چار سبزیوں جن میں آلو،گاجر، بند گوبھی اور سبز مرچ اول کی قیمتوں اضافہ ہوا۔ صوبائی دارالحکومت کے مختلف علاقوں میں ریٹیل کے ریٹس مختلف رہے مارکیٹ کمیٹی کے جاری کر دہ ریٹ کے مطابق بادامی باغ منڈی میں ٹماٹر کی فی کلو قیمت 170سے 180کے درمیان رہی گزشتہ روز ٹماٹر کی اوپن مارکیٹ میں ریٹیل کی قیمت میں کوئی نمایاں کمی نہیں آئی اور اس کا عمومی ریٹ 220سے 250اور بعض علاقوں میں 280روپے فی کلو تک تھا۔ریٹیل میں سبزیوں کی قیمتیں بدستور بلند سطح پر رہیں اور کہیں بھی سبزیاں سرکاری نرخوں کے مقابل دستیاب نہیں تھیں اور ان کے ریٹس سرکاری ریٹس کے مقابل 10سے 50فیصد زیادہ رہے۔