چیئرمین پی ٹی آئی کسی عوامی مقام پر گاڑی سے باہر نہ نکلیں، پولیس کی ہدایات پرعمل درآمد کو یقینی بنایا جائے
راولپنڈی میں جلسے سے قبل پولیس نے پی ٹی آئی قیادت کو تحریری طور پر سکیورٹی ہدایات سے آگاہ کردیا۔پولیس حکام کی جانب سے پی ٹی آئی قیادت کو بھیجے گئے مراسلے میں کہا گیا ہے کہ وی آئی پی کی سکیورٹی کے لیے پولیس کی ہدایات پرعمل درآمد کو یقینی بنایا جائے۔ پولیس نے اپنے مراسلے میں کہا ہے کہ عمران خان کے لیے بلٹ پروف روسٹرم کویقینی بنایا جائے اور چیئرمین پی ٹی آئی لازمی بلٹ پروف جیکٹ کا استعمال کریں، عمران خان کسی عوامی مقام پر گاڑی سے باہر نہ نکلیں۔ مراسلے میں مزید کہا گیا ہے کہ روایت کے برعکس عمران خان کی نقل و حرکت کو خفیہ رکھا جائے۔ واضح رہے کہ گزشتہ روز وزیر داخلہ رانا ثنااللہ نے پریس کانفرنس میں کہا کہ ایجنسیوں کی رپورٹ ہے عمران خان کی جان کو خطرہ ہے، جلسہ ملتوی کر دیں۔
